قالت الفنانة رانيا يوسف إنها لا تتضايق من الانتقاد، لكنها تشعر بالضيق عندما يُوجه لها شتائم، قائلة: «أنا عمري ما شتمت ومتربيتش على كده، بالنسبة لي الشتيمة شيء غريب، وأراها تصرفًا يدل على مرض نفسي، لماذا نلجأ إلى الشتائم؟ يمكنك أن تقول رأيك بأدب وبطريقة مهذبة».

رأيها في النقد الساخر

أضافت رانيا يوسف خلال لقاء مع بودكاست الشركة المتحدة «ع الرايق»، تقديم خالد عليش وميرهان عمرو: «فيه فيديوهات كوميكس اتعملت عني بتكون دمها خفيف، أنا بحبها، عندي فلسفة واضحة: ألبس اللي يعجبني، ما دام اللبس مناسب للمكان والزمان والمناسبة، ما فيش حد له حاجة عندي طالما لم أضايق أحدًا».

التعامل مع غيرة الزوج والتحكم

أوضحت «يوسف» رأيها في تدخل الأزواج قائلة: «لو جوزي قال لي إن اللبس غير مناسب، هناقشه وأسأله ليه؟ لكن الغيرة لها حدود، وكلمة التحكم بايخة جدًا، لو كنت بحبه، ممكن أعمله خاطر عشان الخروجة ما تتحولش لنكد، وكنت بعمل كده كتير في الجوازة الأخيرة، لكن ندمت، دلوقتي، هلبس اللي يعجبني، ولو مش عاجبه اللبس، هو اللي ما يخرجش معي، الأمور بسيطة».

طبيعتها العفوية وعلاقتها بالإعلام

أكدت يوسف: «أنا مش مستفزة للصحافة، بالعكس، بتكلم بقلبي وطبيعتي وعفويتي، نيتي دائمًا كويسة، اللي عايز يأخذ كلامي بمعنى وحش تبقى مشكلته، لكن أنا ما عنديش مشكلة».