تحدث الإعلامي عمرو أديب في برنامجه الحكاية عن وفاة الفنان سليمان عيد والذي رحل عن عالمنا في الساعات الماضية من صباح يوم الجمعة إثر تعرضه لهبوط حاد في الدورة الدموية أدى إلى توقف حاد في عضلة القلب.

عمرو أديب عن وفاة سليمان عيد: خبر وفاته نزل علينا زي الحجر 

وقال عمرو أديب في برنامج الحكاية في تصريحات رصدها موقع تحيا مصر: مفيش ألم زي الموت المفاجئ، وسليمان عيد قبلها بعشر ساعات كان بيعزي وفاجأة خبر وفاته نزل علينا زي الحجر.. اتخطف يعيني وحالة عدم التصديق كانت مالية وشوش الناس في الجنازة.

وفي مداخلة هاتفية للفنان صلاح عبد الله، تحدث باكيا عن عمرو أديب، قائلا: صدمة المفاجأة كانت فظيعة أوي، أنا مش عارف أقول إيه، ده عشرة تجاوزت 25 سنة، من أيام ما كنت في الجامعة وهو كان لسه في خطواته الأولى،  كان عشرة الاحتراف والصداقة والجيرة، وحكايات كتير كان نعم الأخ والصديق، للأسف الشديد من حوالي أسبوع أو 10 أيام كانت آخر مكالمة، ودي كانت أطول فترة منتكلمش فيها، ودايمًا كان بيقولي هاخدك ونخرج ونروح عند محمد إمام.

صلاح عبد الله متأثرا بوفاة سليمان عيد: كان عند حضور ونبيه أوي 

وتابع: اللي وجع دماغي أكتر شريط الذكريات من وهو شاب صغير، كنا بنهزر ونضحك ونبكي، هو كان عنده حضوره وكان نبيه أوي، لدرجة أن في أعمال سينمائية كتير استعانوا بيه علشان تركيبة الكوميديا بتاعته، وكان بيوافق على أدوار صغيرة لفترة كبيرة في حياته، هو تعب وارتاح ربنا يصبر أهله وحبايبه.

أوس أوس عن سليمان عيد: كان نفسه يطلع حج وقدم عليه 

أما عن أوس أوس، فقال: كان نفسه يطلع حج هو ومراته السنة دي وقدم عليها واخر حاجة قلهالي بكرة هنصلي مع بعض الجمعة بس مكنتش عارف أنه مدي ميعاد لمصر كلها كنت فاكر متفق معايا أنا بس.

يذكر، أنه شيع جثمان سليمان عيد من المسجد الكبير بالمجمع الاسلامي بالشيخ زايد، وحضر الجنازة كلا من أشرف زكي والفنان أحمد السقا، والفنان صلاح عبد الله، والفنانة شيماء سيف، وزوجها، والفنانة ريهام عبد الغفور، والمخرج معتز التوني، الفنان ياسر صادق، والفنان منير مكرم، والفنان إيهاب فهمي، والفنان محمد رياض، والفنان أحمد صيام، والإعلامي طارق علام، والفنان كريم محمود عبد العزيز.