علق الناقد الفني طارق الشناوي، على رغبة الفنان عمرو سعد في تجسيد السيرة الذاتية لـ الراحل أحمد زكي، موضحًا أنه كان هناك مشروعين عن السيرة الذاتية للنمر الأسود، لكنهما لم يكتملان.

وقال طارق الشناوي في تصريح خاص لـ القاهرة 24: عمرو سعد ممثل قوي وشاطر ولكن الفكرة مش الشبه أو اللون الأسمر، بدليل إن صابرين نجحت في تجسيد أم كلثوم وهي مش شبها.

وأضاف طارق الشناوي: عمرو سعد لازم يفكر كويس قبل ما يقدم أحمد زكي، وأهم حاجة الكتابة لأن كان في مشروعين قبل كده عن أحمد زكي والإنتاج بيتراجع، خاصة أن الشخصيات المحيطة لـ زكي لسه عايشة فاللي هيكتب هيقول إيه، دي الفكرة.

تعليق عائلة أحمد زكي على تجسيد عمرو سعد لسيرته الذاتية

وفي وقت سابق، علقت الشقيقة الكبرى لـ الفنان الراحل أحمد زكي على رغبة الفنان عمرو سعد، في تجسيد السيرة الذاتية لـ النمر الأسود، في عمل فني.

وقالت في تصريح خاص لـ القاهرة 24: عمرو سعد ممثل موهوب ومحترم، ولو هيقدم الشخصية بدون إساءة وفيها احترام لـ قيمة وتاريخ أحمد زكي إحنا أول ناس تساعد، المهم يرجعوا لينا في كتابة السيناريو ويكون كل حاجة بموافقة العائلة لأن إحنا اللي لينا الحق نقول إيه اللي يتناولوه وإيه لأ.

وتابعت: إحنا اتعرض علينا كتير أن يتقدم سيرته الذاتية في أعمال ورفضنا، ولكن لو رجعوا لينا في الكتابة وتناولوا سيرته وتاريخه بشكل يليق به يبقى ليه لأ؟.