عبرت ملكة جمال لبنان السابقة والممثلة نادين ويلسون نجيم عن رأيها بأجواء عيد الميلاد المجيد هذا العام، حيث كتبت على صفحتها على أحد مواقع التواصل الإجتماعي:"
إذا سألتني كيف كانت ليلة العيد هالسنة،
بقلك منيحة.

بس إذا سألتني أكتر، إذا فتت أعمق شوي، بقلك:
ما حسّيت بفرحة.
حسّيت الوقت عم يمرق بلا معنى حقيقي.
حسّيت بظلم كبير وبحزن ما بينوصف.
حسّيت كأنّا بمسرحية، وأنا عم شوف حالي من برّا لجوا، وعم شوف الأقنعة عم تتبدّل، واحد ورا التاني.

بقلك شفت الشوارع شبه فاضية، والزينة بعدها مخبّاية بالمستودعات.
بقلك الأضوية بعدها مطفية، والبنايات بعدها بالأرض.
بقلك المـ وتى ما اندفـ نوا بعد،
والأحياء ما تصالحوا بعد.

بقلك هيدا مش العيد اللي تخيّلتو بلبنان، مش هالعيد اللبناني الجميل.

عيد الميلاد بلبنان حسد العالم، وما في شي يخلّيني صدّق العكس.
عيد الميلاد بلبنان هو الدفا، هو الجمال، هو المحبة، هو السعادة، هو العدالة، وهو القداسة.

بدي، بتمنى، بهدي، وبصلي
إنو نحط إيدنا بإيد بعض، نشتغل مع بعض،
لنرجّع عيدنا اللبناني."